Lipido

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Os lipidos son biomoleculas insolubles en augua que presentan una alta solubilidat en disolvents organicos, como lo cloroformo.^[1][2]

A etimolochía d'a parola lipido proviene d'a forma prefixata d'a parola griega lípos, que significa "grasa" y d'a forma sufixata d'a parola griega eĩdos, que significa "apariencia, fegura".^[3]

A diferencia d'os glucidos y d'as proteínas, que tienen grupos funcionals caracteristicos, os lipidos no tienen dengún grupo funcional propio. En realidat a sola caracteristica común que tienen ye a solubilidat en disolvents organicos no polars (benceno, éter dietilico,...). Ista propiedat tamién los diferencia d'os glucidos y as proteínas que son solubles en disolvents polars como l'augua. A razón por a que son insolubles en disolvents polars ye porque as suyas estructuras quimicas son formatas por grans cadenas de carbonios que son apolars.^[4]

Os lipidos se pueden dividir en diversos grupos:

1. Os lipidos simples son os que nomás contienen carbonio, oxicheno y hidrocheno, y comprenden os trigliceridos, ditos grasas u aceites seguntes si son solidos u liquidos, as ceras y os esters d'os esterols; adintro d'iste zaguer grupo, un d'os esterols mas conoixitos ye o colesterol.
2. Os lipidos complexos contienen, amás, atros elementos y son ditos, por un regular, lipoides; comprenden os fosfolipidos, os esfingolipidos y os glicolipidos.^[5]

Una atra clasificación se basa en a reacción de saponificación:

1. Se dicen lipidos saponificables os lipidos que pueden reaccionar con hidroxidos alcalins ta formar xabons. Toz contienen acidos grasos. Adintro d'iste grupo tenemos:
   1. Acidos grasos
   2. Trigliceridos
   3. Ceridos
   4. Fosfolipidos
   5. Icosanoides
2. Os lipidos no saponificables son aquellos que no reaccionan con hidroxidos alcalins ta dar xabons. Son lipidos que no contienen acidos grasos. Bi'n ha de dos tipos:
   1. Esteroides
   2. Terpenoides^[4]

1. ↑ Berg, J.M. i col., Bioquímica, Reverté, 2008 ISBN 84-291-7600-4
2. ↑ Fahy E, Subramaniam S., Brown H., Glass C., Merrill A., Murphy R., Raetz C., Russell D., Seyama Y., Shaw W., Shimizu T., Spener F., van Meer G., VanNieuwenhze M., White S., Witztum J., Dennis E. A comprehensive classification system for lipids, J Lipid Res, 46, 2005
3. ↑ Enciclopèdia Catalana, Gran Diccionari de la llengua catalana, Barcelona, 1999
4. ↑ ^{4,0 4,1} Domènech, X. i col., Bioelements i Biomolècules, Edicions Universitat Barcelona, 1992 ISBN 84-7533-896-8
5. ↑ Enciclopèdia Catalana, L'Enciclopèdia, Barcelona, 1999